US President 45na Donald J. Trump chuan US history a Defense Budget tam turu ber tur a siam ta. Thawhtanni khan White House Office of the Management of Budget ruahman chu, Pentagon Comptroller David Norquist chuan US Dense Budget Fiscal Year 2019 tur chu a puang chhuak ta a, a vaiin (total) US$ tluklehdingawn 716 zet a tling chho a ni. Defense bik atan liau liau chuan US$ tluklehdingawn 686 a ni. Fiscal Year Budget hrim hrim hi US$ 4.4 trillion (tluklehdingawn sangkhat hi trillion 1 a ni-CT) niin, chung zingah Defense Budget hi a tel ve.
Defense Secy Gen. Jim Mattis chuan hetianga Defense Budget ruahman puan chhuah a nih hmain, “Obama hun laiin military tha ber in nei thei lo vang. Ram dang hnam (nations) dang hmaah America chu a kal ang” a lo ti tawh a, President Obama kha chuan defense budget hi a titlem hlek hlek. President Trump chuan “Chona leh buaina pumpelh turin leh remna nei turin chakna (strength) a pawimawh a ni” a ti thin.
Defense Budget $ tluklehdingawn 686 zinga $ tluklehdingawn 617 defense bik liau liauah hman a ni anga, Overseas Contigency Operations atan $ tluklehdingawn 69 dah niin, Energy Department nena hman tur nen US$ tluklehdingawn 716 a kaichho ta dawrh mai a ni.
Defense Budget siamna tura Document-ah chuan China leh Russia chu US hmelma tanglian mek a ni a, he ram 2 hi America eptu lian ber tur niin, chumi chona chhang thei tura inbuatsaih a tul a ni, tih a ni.
Hetiang khawpa defense tam turu buru hian enge tih an tum ang? E le, sipai leh ralthuam an siam belh nual dawn a ni ber. Hetiang hian:
(1) F-35 Joint Strike Force atan F-35 chu 77 zet lei belh a ni ang. Air Force tan 48, Marines Corps tan 20, Navy tan 9 lei belh a ni ang. Tin, F/A-18 Super Hornet jet fighters 24 lei belh a ni anga, Navy tan 10 dah a ni ang. Aircraft Carrier, Combatships Destroyers 3, Virginia class-Submarines 2 lei a ni bawk ang. Aircraft ralthuam chher tharna tur ringawt hi US$ tluklehdingawn 55.2 dah a ni a, Lawng tuk belh nan US$ tluklehdingawn 33.1 dah a ni.
(2) Space-based Systems siam nan US$ tluklehdingawn 9 dah a ni a, Missile bunna hmun siam nan US$ tluklehdingawn 20.7, Missile Defense System Program atan US$ tluklehdingawn 66.8 dah niin, Mission supports atan US$ tluklehdingawn 18.9 dah a ni.
(3) European Deterrence Initiative (NATO) pual tan US$ tluklehdingawn 1.6 (a vaiin $ tluklehdingawn 6.5) dah a ni bawk.
(4) Congress-in National Defense Authorization Act anga a remtih sak chuan, Sipai (troops) 15,600 lak belh a ni anga, Navy atan 7,500; Marines Corps atan 1,100; Air Force leh Army atan 4,000 ve ve lak an ni ang.
US Navy ah 335,400 awm mekin, Marines Corps ah 186,000, Army, Navy, Air Force Reserve atan 800 lak belh an ni ang. Tin, Air National Guard atan 500 lak belh an ni bawk ang.
Aircrafts 400 teh meuh lei belh a ni dawn a, F-35 fighters 77, F/A-18E Super Hornet 24, AH-Apache helicopters raltuthei 60, UH-Black Hawk helicopters 68 te a tel ang. Kum 2017 aia US Defense Budget punna hi 10% ang niin, nikum atanga teh chuan 2.6% ang a ni. Staff Sergeant hlawh pawh US$ 1,169 in a tan tawh ang.
Overseas Contigency Operations atana sum dah dan khi Afghnaistan ah US$ tluklehdingawn 46.3 a ni. Iraq & Syria atan US$ tluklehdingawn 15.3 dah niin, Europe Defense Initiative (NATO pual) deuh atan US$ tluklehdingawn 6.5 dah a ni a, US chuan ram dang nena Security inremna an ziak thuta hman tur US$ maktaduai 900 a dah bawk.
Donald Trump chuan 2016 Presidential election lai leh a hnuah “America military chakna” siam thar, tuaithar a lo sawi thin angin, Defense Budget pawh a siam turu hle a ni. Kum 2050 thlengin Combat-ships 335 lei belh a la tum! Alaska leh California hmunah US chuan Missile Interceptors 44 a dah a, mahse, chung Interceptors 10-18 chauh chu test paltlang an ni.
-CT. Lalrinawma
